Afines, pustis de tanta matana, bi semus resessidos a ponner una bestimenta noa a una faina chi, mancari non fit gai betza de ch'imbolare, aiat bisonzu de bessire torra in giru cun un'aerzu prus dechidu e nou. Como podimus bessire torra in pratza, o menzus a narrer in sa retza e fagher a bider cantu sa limba sarda est capatze de rezere in su tempus presente Cherimus fagher ischire a totu chi, sa limba sarda no est in agonia, aeschida dae una glabbalidade chi s'isparghet comente unu gutiu de ozu in s'abba. Custu modu puru de bessire a campu est una proa chi si podent parare sas curturas egemones chi impitant sa limba che atza pro nd'imbolare sos chi s'arrampellant. Sa globbalidade no est solu una fura de sos benes de onzunu, est puru un'impoverimentu de su connotu de sa gente. Issa nos faghet pissighire bisos propagandados dae sos medias e nos che faghet fuliare che robba betza su connotu nostru. Nos faghet lassare sa chirca de unu modu prus dechidu e asseliadu de passare sa bida. Nos faghet isperder cantu nos ant lassadu in eredidade sos mannos nostros. Nois sardos puru depimus narrer chi nono a custa libbertade chi si leat su prus forte de narrer chi su chi andat bene a isse andat bene pro totu. Sas limbas de minorantzia puru sunt agorradas. Sunt agorradas dae s'egemonia curturale de sos Istados. S'apretu de sas industrias mediaticas aeschent cun sa poderantzia issoro sas boghes chi lis sunt contra.
Su istadu italianu nachi nos at de amparare. Nachi chi s'intentu de custoire sas curturas e sas limbas minores est a ponner in possa cantu narat sa costitutzione de sa Repubblica.
Eja nadu l'at, e postu in lege puru, ma custu non cheret narrer nudda: s'Istadu nos podet amparare e custoire puru si nos che ponet intro de unu museu comente fossiles.
Non tocat a s'Istadu a nos amparare, o assumancu non solu a isse, semper chi lu cherfat fagher de abberu: tocat a nois a nos amparare e a nos incurare pro no esser aeschidos dae tota sa fortza de sas limbas dominantes.
Sa limba sarda est una limba regionale chi at in mesu a sas limbas de minorantzia unu postu de importu mannu. S'importantzia sua bi la dat s'impitu chi nde faghent sos sardos oe, e ca tenet raighinas antigas e fortes. Su chi resessimus a fagher cun sa limba sarda podet esser de ajudu e de esempru a sas ateras limbas minores, siat chi siant intro de sas lacanas de su Istadu italianu, siat chi che siant in ateros istados furisteris.

Sa resessida nostra de istare cun coragiu e puntilliu in mesu a sa comunicatzione globbale, podet dare animu a totu cuddas personas chi galu istant in istantargiu. In istantargiu tra sa limba Istatale e sa limba de domo, a cuddas personas chi timent de si dare a bider impitende a onzi ocasione sa limba de sos antenados, chi no ischint parare fronte e si lassant bincher dae sa propaganda de unu mezoru fartzu chi li porrint sas sirenas de sas curturas dominantes.

fortza paris