Sos agetivos

Sos agetivos sun cussas paraulas chi impreamus cando amus de pretzisare una cantidade e o una calidade de sos numenes. O puru una indicatzione.

Sos agetivos de calidade sunt cuddas paraulas chi si ligant a su numene pro nde pretzisare menzus sa calidade. In Sardu andant postos da poi de su numene de regula,e nde sighint su genere. A bortas s'agetivu de calidade si aunit cun unu verbu pro specificare menzus una atzione de cusse.

Esempros:

Apo bidu una femina betza currende una puddighina in sa carrera, agiummai bi abbarrat sica.

Apo bidu duas feminas betzas arrejonende in su giannile de sa domo issoro.

Apo bidu un'omine betzu cun unu garrigu de linna a coddu, siscuru non nde podiat prus in cussa pigada mala.

Apo bidu duos omines betzos azufados comente duos giobanos de bintannos. De onzi colore si nde bidet in sa bida nostra.

Apo bidu unu piseddu minore totu-cantu isermoradu pranghende a trollios in sa carrera e neunu lu leaiat in bratzu.

Apo bidu una pisedda minore impare cun tantos fedales suos mascros chi chircaiat de pissiare a sa ritza.

Apo bidu duos piseddos minores truvende unu fiotu de roba stanote. Già semus andende bene?

Apo bidu duas piseddas minores ninnende una pupia de stratzu.

Già l'est intradu cun bonu faghere a cussa bestia ma issa non fit pro nudda maseda.

Comente podides bider da sos esempros, MINORE abbarrat su matessi siat accumpanzende-si a su genere mascru che a su genere femina. BETE at solu una forma chi s'accumpanzat a totu sos generes.

Bete e omine! Est tocadu de si mugrare intrende in sa gianna ca si no tocat sa trae.

Bete e berbeghe! Non nde aia mai bidu de goi manna.

Bete e muntones chi as fattu! E como chie los garrigat?

Comente podides notare da sos esempros chi bos apo fatu: bete at regulas diversas da su restu de sos agetivos non sighit su numene ma si ponet addainanti e at una forma sola pro onzi ocasione.

Sos agetivos de calidade s'impreant puru cando cherimus cumparare duas o prus cosas personas o animales. Si faghet pro dare una misura chi podet essere: a chepare, prus manna o prus minore. In Sardu amus paritzas maneras pro faghere sa cumparatzione de duas o prus cosas chi sunt de sa matessi mannura. (UNA) pro cumparare si una cosa o animale omine est prus manna o prus minore

Pro fagher unu cunfrontu a che pare impreamus:

cantu de, comente de, che a

Esempros:

Pedru est forte cantu de Mario, est solu chi isse non lu dat a bider comente a isse.

Pedru est forte comente de Mario, pero est de mancu atrividu e s'istat semper a coa.

Pedru est forte che a Mario, ma si creet prus forte.

Pedru est forte che Mario, ma cando si tratat de arrejonare no ischit mancu su chi narat.

Pro fagher su cunfrontu tra una cosa prus manna e una prus minore in Sardu usamus custas paraulas:

prus de,prus che,de prus de

de regula tra s'avverbiu (PRUS) e sa prepositzione (DE) andat postu un'agetivu de calidade o de cantidade, ma no semper est gai, si podet ponner puru da poi de s'agetivu.

Esempros:

prus mannu de, prus bellu de,prus pretzisu de,mannu prus de,bellu prus de,pretzisu prus de

Esempros:

Su prus mannu de su logu est tiu Barore Casula.

Su ricamu suo est prus pretzisu de su tuo.

Frade tuo est mannu prus de a tie.

A giogare a fubbaru est prus bellu de istudiare in iscola

(PRUS CHE) s'impreat cando su cunfrontu est tra duos agetivos de calidade o de cantidade.

Esempros:

A bortas si bident cosas chi sunt prus malas che bellas.

Su mulu est prus tontu che forte, ma già bi est su padronu chi lu ghiat.

Su mele de s'atunzu est prus ranchidu che durche.

fizu meu at istudiadu de prus de su tou, gai at apidu votos prus artos.

Isse de cussa istoria nde ischit de prus de onz'ateru, pregunta-lu si cheres ischire carchi cosa.

In sardu amus custos modos de fagher unu cunfrontu tra una cosa manna e una prus minore e sunt: prus pagu... de, de mancu... de, prus pagu... che,

Esempros:

Apo fizos chi sunt prus pagu macos de a tie

Custa peta est prus pagu cota che cota

Luisi est de mancu ricu de su frade

Apo bidu a Giuanne deris in su tzilleri, paret chi siat de mancu gaddinosu de prima