Sos pronumenes de complementu

Sos pronumenes personales de complementu ant duas formas: forma tonica e forma debbole. s'impreu de sos pronumenes personales de complementu in forma tonica, sunt necessarios cando depimus mustrare subra de chie che falat s'atzione ed est antitzipadu da sa prepositzione (A). cando faghet sa funtzione del complementu indiretu est antitzipada da calesisiat prepositzione.

Sas formas tonicas

mie,me, megus

tie, te,tegus

isse, issu, issa

nois
bois
issos.

Sas formas tonicas (MIE e TIE) mudant forma a segundu de sa prepositzione chi l'accumpanzat.

A-MIE ( cando benit antitzipada da sa prepositzione (a))

Esempros:

A-mie non mi nd'importat nudda de su chi ses fatende.Est ora de andare e andamus. Move-ti!

A mie mi ant nadu chi issos non l'aiant mai bidu su cane. Faularzos sunt. Su cane l'ant mortu issos.

DAE ME o puru DAE A MIE ( cando benit accumpazada dae sa prepositzione (dae) ma andat bene puru sa forma (a-mie).

Esempros:

Dae me non bi azis a bider unu soddu.Sas aimas chi m'azis bendidu sunt totu unu muntone de ruinzu.

Dae me non penso chi ant a ischire nudda. A mie custos modos de fagher, de istzare sa gente non mi andant a geniu.

DE ME (cando benit antitzipada da sa prepositzione (DE)

Esempros:

De me ite bos nde faghides? Sezis gia una grefa bona, non bastades pro fagher su chi azis de faghere?

De a mie issos non ischint prus nudda. Mi nde so andadu da domo cando fia pitzinnu.

IN ME (cando benit antitzipada da sa prepositzione in)

Esempros:

IN ME non b'at malitzia.

So IN ME chi tue no apas cumpresu chi est chi cumandat in domo.

PRO ME o puru PRO A MIE (cando benit antitzipada da sa prepositzione pro.)

Esempros:

PRO ME podides fagher totu su chi cherides.

PRO A MIE sezis isballiende a bos la leare de custa manera, issos non bos cheriant ofendere.

TRA ME (cando benit antitzipada da sa prepositzione tra)

Esempros:

TRA ME e te non b'at prus paraulas.Anda puru in bonora.

TRA ME e me apo pensadu chi forsis non fit tempus de ispendere in cussa compora, ma tue cherias comporare a morte segada.

CUN MEGUS (cando benit antitzipada da sa prepositzione cun)

Esempros:

CUN MEGUS benzende bi ses?

CUN MEGUS est bennidu tziu Larentu a comporare su turrone. Ma nos l'amus mandigadu in caminu.

TIE,TEGUS, te

(sighint sas matessis regulas de (mie-me)

A TIE

Esempros:

A tie non ti lu naro

DAE TE o puru DAE A TIE

Esempros:

deo no cherzo intender nudda dae te.

Dae a tie cando apo apidu bisonzu no apo apidu mancu una sesina.

DE TE o puru DE A TIE

Esempros:

no apo bisonzu de te.Podes andare puru a ti dormire.

de a tie no amus ischidu prus nudda pro maigantu tempus . Inue fist?

IN TE

Esempros:

in te non bi fato prus contu.

PRO TE o puru PRO A TIE

Esempros:

Innoghe che at unu pacu pro te. A ti lu leo?

Pro a tie no che at arribadu nudda.

TRA TE

Esempros:

Ite as a esser pessende tra te e te.

CUN TEGUS

Esempros:

Cun tegus non bi so prus benzende como, si cheres bi poto benner cras.