Sas prepositziones

Sas prepositziones sunt paraulas chi si ponent addainanti de ateras paraulas (numenes,pronumenes,verbos,averbios) pro nde pretzisare menzus sa funtzione chi cussas paraulas ant in su faeddu e pro ponnere cussas paraulas in relatzione s'una cun s'atera. Leadas a sa sola non ant perunu sinnificadu.

In Sardu amus

a, cun o chin, dae, de, in, pro, tra

(a, pro,dae, e in) sunt impreadas puru a giunghere duas o prus prepositziones.

Sa prepositzione (A) serbit a nos mustrare una diretzione de movimentu o unu giassu de agabbu

Esempros:

A babbu nadu bi l'as che semus andende a Tatari?

A cue amus de torrare totu, a dolu nostru.

Nadu bos l'aia chi a isse non lu depiazis nemmancu chircare.

A mie mi depent cramare si mi cherent in cue

Fia andende pro sos fatos mios in unu tzirighinu, a cando, a sa impessada bessit unu porcu-abru a buca abberta e in idea de mi si trubare.

A cheret chi s'acunnortet a bessire chito su manzanu si cheret traballiare cun megus

A cherrer una cosa bi cheret pagu a l'aer bi cheret meda

Sa prepositzione (CUN) serbit a nos mustrare cun chie semus o cun chie andamus siat ̣mine o cosa o animale

Esempros:

Anda-bi cun Miali a comporare sos craos chi mi serbint a fagher su intauladu.

Bae cun fizu meu chi isse ischit su caminu.

Est torradu cun sa muzere, a istare a sa sola non li cumbeniat chi non s'ischit fagher nemmancu a mandigare.

Si nd'est andadu cun tota sa robba sua, in presse e chena saludare a nemos. Mancu chi esseret istadu furende.

sa prepositzione (DAE) serbit a mustrare da inue benit una cosa animale o omine o dae inue si nd'andat.

Esempros:

Dae te non mi l'isetaia unu cumpurtamentu gai. Mi so semper fidadu, custu est su chi nd'apo...

Dae cue m'est bennidu su corpu, dae daesegus de cussu muru inue b'est sa tupa de su rueddu.

Dae ite nde so bessidu l'isco solu eo; cussas sunt cosas chi ti proant de abberu in sa bida.

Sa prepositzione (DE) serbit a mustrare s'apartenentzia , de chie o de ite semus nende

Esempros:

De Pedru non b'at de si nde fidare meda: at semper fatu su chi li est parfidu in bida sua.

De inue sunt sos bighinos tuos?

De abboighinare a Giuanne non ti nde ses galu istracadu? Mi pares tichirriende che unu porcu iscannadu. Agabba-la.

Sa prepositzione (IN) serbit a mustrare unu logu in su ispatziu o in su tempus siat chi s'agatet de abberu in sa realidade, o siat solu in sa mente comente un'astratzione.

Esempros:

In custa garrera cras faghent festa. A bos nde benides?

Unu in cras amus a bider comente fagher; cando as a cumandare tue: pro como faghimus comente cherzo eo.

In unu bisu non b'at ne cabu ne coa

sa prepositzione (PRO) serbit a mustrare su motivu de una atzione o de una cosa

Esempros:

Custos durches sunt fatos pro esser mandigados. Leade a cantu nde cherides. Ponide-bos-nde fintzas in bussaca.

E pro cussu nois non nd'andamus. Semus istracos de iscurtare sos machines bostros.

Sa prepositzione (TRA) serbit siat a su ischirriare siat su cumponner una ligadura tra duas o prus cosas o personas

Esempros:

Non si podet fagher unu paragone tra frade tou e frade meu:non sunt cabales nemmancu de edade.

Chi b'apat carchi cosa tra issos duos! Si fint totu su sero abbaidende comente chi si nde aerent cherfidu bogare sos ogros.