Sos pronumenes

Sos pronumenes sunt cuddas paraulas chi impitamus cando fatende unu discursu non cherimus ripetire su numene de su chi semus faeddende.

Esempros:

Luisa est torrada a domo cuitende custa note, ma eo li aia nadu chi no esseret nemmancu recuida

Babbu at cramadu a giuanne pro lu ajuare a truvare sa robba, ma isse non li at nemmancu rispostu.

Sos pronumenes personales

Sos pronumenes personales sunt cuddas paraulas chi si impitant cando semus fatende riferimentu a su genere umanu.

Esempros.

Tue cherias chi mi essere arressu totu sa note a traballiare, ma a mie non mi interessat su dinari

Deris sero isse mi at nadu chi mi nd'essere andadu ca già bastaiat a sa sola pro concruire su chi fit fatende.

Sos pronumenes personales sunt ses: tres singolares e tres prurales. Millos in ordine:

eo (sa persona chi faeddat)
tue ( sa persona chi ascurtat)
isse, issa ( sa persona de sa cale si faeddat)
nois( sas personas chi faeddant)
bois (sas personas chi ascurtant)
issos, issas (sas personas de sas cales si faeddat)

Esempros.

Eo cando fia minore istaia in campagna e tentaia sa robba de babbu comente chi essere stadu unu cateddu.

Tue mi lu depes narrer semper cando as bisonzu de ajudu ca galu non ses mere de su modu de fagher.

Isse fit abbituadu a andare a bellu-a bellu, ma suta sas armas l'ant apretadu forte, a su chi at contadu.

Issa li cheriat bene de abberu a su maridu cando fint giovanos, ma como in sa betzesa si che sunt istesiende.

Nois bi fimus in cue cando est sutzessu totu cussu abbolotu.

Bois mi lu depides narrer cando sezis istracos e gai bos damus su cambiu.

Issos sunt lassende andare totu in oromala su bene ca non ant gana de traballiare. Peus pro a issos.

Issas faghiant su chi li pariant in cussu logu. Ma como est totu agabbadu.