Sas prepositziones articoladas

In Sardu s'articolu si acumpanzat a carchi prepositzione e cumponent sa prepositzione articolada sas propositziones sunt custas: (A,CUN,DE,IN) e cumponent custas prepositziones articoladas:

Prepositzione (A) cun su articolu determinativu.

A SU, A SA, A SOS, A SAS

Esempros:

A su cumpanzu tuo nara-bi-lu chi istet mudu si non cheret chi li porra carchi iscabanada.

A sa mama de Luisi l'ant leada a traballiare in comune.

A sos amigos de Nanni los ant matzucados bene in sa discoteca sapadu passadu; meno male chi isse non bi fit.

A sas sorres Farinas l'ant isrobbadu sa butega sa note de martis de carasegare. Bi ant pesadu puru su ballu.

Sa prepositzione (CUN) lighende-si cun s'articolu format:

cun su,cun sa ,cun sos, cun sas

e serbit a mustrare cun chi nos semus acumpanzende e cun ite.

Esempros:

Cun su giometra amus apidu ite narrer,non resessia mai a lu persighire pro mi fagher su disegnu de sa domo.

Cun sa mastra Canu andaiamus meda de acordu cando fia in sas elementares.

Cun sos iscolanos bi cheret passientzia meda ca a cussa edade lis praghet prus a giogare che a istudiare.

Cun sas manos e cun sa conca s'omine at conchistadu su podere subra sos ateros animales.

Si si depet contare de omines, animales o cosas leamus sa prepositzione (DE) prus s'articolu:

DE SU, DE SA, DE SOS, DE SAS

Esempros:

Cussa māchina est de su frade de Mario.

Eo como so subra de su letu corcadu: ma giā mi nde peso luego. Iseta-mi cue.

Sa litera chi l'est arrivida est de sa sorre; cussa chi che istat in Germania.

Sa litera est subra de sa televisione. Est arrivida custu manzanu.

Cussos trastis sunt de sos bighinos. Non los poto arrampanare ca imbrutant totu su bighinadu.

Conta-lis de sos pitzinnos: de ite ant fatu deris sero.

Cussas bustas de s'arga chi ant frundidu cue sunt de sas istranzas. Benint mandigant e lassant totue s'arga.

Su tema de sas iscolanas non fit bene fatu, gai sa mastra at lassadu stare sa proa. nachi la torrat a fagher.

Si si depet contare de omines, animales,o cosas chi sunt in unu logu si leat sa prepositzione (IN) e s'articolu:

IN SU, IN SA, IN SOS, IN SAS

Esempros:

In su puddarzu b'at duos puddos chi s'istant semper brighende-si, gai sunt totu ispilidos.

In sa tasca b'est su casu. Cando ti benit fāmine as a mandigare.

In sos montes de su gennargentu bi frocat, e su nie bi abbarrat totu su Ijerru.

In sas pinnas betzas, cando benit su beranu, sas rundines bi faghent sos nidos.